雅谷餐廳

营业中

休息中

今次同老婆第一次嚟呢度，佢第一次嚟，比呢度嘅裝修驚嘆左一下，佢話香港老牌餐廳點會有咁靚嘅裝修啊！係呀呢度仲有好多藝術品同古董。好鍾意呢度嘅wine list, 系用 label 做成，開咗半支香檳半支紅酒，前菜我點左蒙古生牛肉，經理喺你面前調制，因我哋share所以佢幫我哋平均分開一人一碟，但每碟份量都唔少喎。仲有鮮龍蝦錢袋，龍蝦就因為有個包袋住所以留俾我哋自己分。回想十幾歲喺銅鑼灣玩嘅時候，大哥帶過嚟一次呢度食飯，果次仲見到一個明星大家可以估下係邊個。再黎一人一個洋蔥湯，如果間餐廳有洋蔥湯我多數都會飲，其實洋蔥湯好難做我自己做過搞到隻手好攰，所以一試就知道呢度嘅洋蔥湯好正。主菜叫左精選牛扒(兩位用），樣樣嘢都做得好出色，老婆要咗個焗疏乎厘做甜品我就飲埋啲酒就算啦，對於我呢個舊地重遊嘅人回憶特別多，希望以後有時間多啲再返嚟。畢竟香港嘅老餐廳已經越來越少。