大將 (已結業)

今日同屋企人一齊過嚟將軍澳呢邊行街，夜晚大家都想打邊爐，今次就試吓日式嘅邊爐。呢間日式火鍋店印象中好似開咗冇耐，內部裝修幾靚，好有和式嘅風格，門面仲有一個範圍有好多火鍋相關嘅products，應該都係自家品牌。自助區嘅火鍋配料都算多，驚喜嘅係有幾款熟食，包括玉子、串燒、薄餅等等，仲有紅豆湯，窩夫機可以整窩夫食，啱晒小朋友。飲品方面選擇都多，有好多鴻福堂細支裝嘅飲品，都有自助汽水機、咖啡機，選擇豐富。我哋揀咗豚肉放題套餐，湯底係花生沙嗲湯底，好濃味，唔會太鹹。我哋嘅套餐可以任食北海道十勝豚梅花肉，每一片嘅梅花肉都好薄，肥瘦均勻，色澤好靚好新鮮。另外仲有美國嚴選極上牛，都好正！仲有普通豬肉片同埋雞肉片，啱晒食肉獸。最後當然唔少得係甜品啦，有自助雪糕機，係乳酪雪糕，仲有唔少配料，同屋企不斷encore，唔會太甜味道都幾好。總括嚟講我同屋企人都幾滿意呢間日式火鍋，價錢唔貴，值得一食。