舖頭裝修簡單親民，天氣稍涼，我哋揀左坐門口出面。
店員隨即擺低點餐紙，仲吩咐我哋可以口頭落左雞煲先，配料慢慢點。我地第一次黎咁就揀左佢個招牌雞煲(小辣)$158/位，配料係任點任食，汽水飲飲，要啤酒就人頭加$15就可以無限暢飲喇！
好快個雞煲黎到個樣都幾似樣，仲加左好多我地至愛嘅芫茜，唔中意嘅朋友可以預先同店員講唔好落，試下個汁真係可以話好過好多單點嘅雞煲舖頭，老闆仲叫我地等佢滾左再攪下個底撈下佢先食。。5分鐘左右我地就開始食喇，煲入面仲加左翠肉瓜吸晒d汁好好味，雞嘅份量都算正常，不過可能滾多陣會入味d。
食完雞就加湯打邊爐，加完湯之後淡左好多，不過店舖有提供辣汁，自助式任加，加返之後都唔錯。雖然係任食，但d配料都唔會俾d質數差劣嘅食物，而且都放得好整齊，出面有d任食真係拎到過黎見到都唔想食，萵荀片都有返d厚度唔會係一陣風嗰d，仲有豬生腸真係唔係到到有，個炸魚皮直頭好有驚喜，仲同出面五六十蚊一碟果d有得揮，絕對對得住$158/位嘅價錢，而且店員姐姐服務好好，眼見樓面好似得佢一個，但係佢一見到我要想叫嘢或者想換gas, 佢都會即刻過黎幫我地手，當時其實都有7,8 枱客架，見到佢不斷行出行入好勤力。老闆都好熱情招待，我行去睇下雪櫃有咩飲，諗住轉頭先拎，佢見我無拎就即刻同我講話係任飲架隨便拎。。。（其實我習慣食到咁上下先飲嘢嘅）不過感受到佢地好take care d 食客。無酒精飲品有可樂雪碧水果梳打冰紅茶仲有鴻福堂檸檬茶。。
話限時2個鐘任食不過我見有d 食客都坐左唔只兩個鐘老闆都冇趕人走真心讚～～～
埋單$316真係超抵有service又可以過下雞煲癮！終於搵到間可以再食luuuu.
