翠河餐廳 (已結業)

本人食过好多间「翠」字头嘅餐厅, 印象中都系唔太好受嘅。经过旺角亚皆老街上海街交界嘅「翠河餐厅」门口个下午茶餐牌见到有「赞岐乌冬」呢几个字, 好吸引, 咁就吸咗我入去食。呢度餐厅环境其实几舒适嘅, 玻璃窗可以望到出面街景, 见到好多游客, 喺朗豪坊行嚟行去, 熙来攘往。餐厅服务员态度几好, 服务到位、有礼貌。我叫咗个<猪软骨赞岐乌冬> 汤底应该系一般「潮州粉面汤底」, 但食落都唔错, 配衬得到。作为乌冬嘅汤底, 几特别。乌冬质地烟烟靭靭, 我估佢就算唔系真正嘅赞岐乌冬, 都扮得好似, 好接近嘅货色, 唔系一般好平好平𠮶啲「当当」货。猪软骨份量充足, 炆得好好味(柱侯味), 肉的部分淋, 软骨嘅部分爽脆。<热奶茶> 亦都出色, 茶味香浓, 茶身幼滑, 厚薄适中。呢间餐厅有个缺点: 就系上去一楼条楼梯又斜、又窄、又唔干净。