新派韓食館 (已結業)

伏！伏！伏！一行五人，有老有嫩經過間無乜客人但裝修幾特別嘅韓國料理。坐低睇餐牌，發現設計幾有心思，食物用精緻插圖代替照片；而且菜式選擇亦多元化，有鐵板、步隊鍋、堂製炒飯等等...眾人商議後叫咗鐵板牛、芝士步隊鍋同埋堂製炒飯。正當大家期待美食登場之際，一位疑似Oppa嘅侍應開始背住我地替隔離張枱「炒飯」，全程一氣呵成、完成時亦替客人分配，令眾人非常期待！勢估吾到我地叫嘅同一個炒飯，竟然可以由三位侍應以「愛理不理」、「行行企企」嘅態度「是但」完成，最奇怪係最後一位「疑似韓藉人士」行開之後亦無表示「食得」，令大家以為要等「大廚」發落，再等幾咗分鐘，見佢無返嚟，唯有搵經理查詢，佢先語帶諷刺咁話「早就食得」，辯稱因為最後果位係「外藉人士」唔識同我地講喎！可憐個舊幾水嘅矜貴炒飯「蛋又燶飯又燶」，當我地投訴佢地咁唔專業、搞到個飯燶晒食唔到，經理好似唔多志在咁話「取消咗佢囉」。何解星期六晚黃金時間坐唔到一半？終於真相大白！可憐呢間餐廳老闆樣樣用心，就係衰在請到班專業倒米員幫佢趕客！