堅韓牛韓燒放題 (已結業)

其實食之前睇咗好多負評，個心已經打退堂鼓，但出於對蕭生嘅支持，加上先前食過一次堅石燒感覺幾好，於是抱住「一於試下」嘅態度黎咗食。點知真係中伏。既然主打韓牛，咁我就講下啲牛。坐低無耐上咗頭盤，我唔記得具體係邊一個部分嘅牛肉，燒完之後其中三個朋友話有陣酸醙味（必須要講清楚嘅係，並唔係所有肉都有酸醙味，譬如我自己嗰舊就有，但我聞咗佢哋嘅又的確有，不過食落口就唔覺有咩怪味）。再講下啲牛嘅味道同口感。我諗好多人同我一樣，聽到「韓牛」呢兩個字自不然會有較高嘅期望，但呢間店嘅牛，好明顯係達唔到要求。牛味唔夠濃郁，口感亦十分普通，尤其是牛肩肉，好多筋好韌。標榜韓牛，收咁上下高嘅價錢，而達唔到韓牛應有嘅質素，好難唔令人大失所望。我諗呢點亦都係好多人俾負評嘅原因。其次，啲熟食亦都令人不敢恭維。除咗牛柳粒係稱得上滿意之外，其他諸如炒粉絲（太重麻油味同偏鹹）、雞翼（有陣類似椰子油嘅奇怪味）、泡菜餃（啲餃子皮硬到......）大醬湯同牛肉石鍋飯等都好唔掂，個石鍋飯更加hea到係就咁將一碗白飯倒入石鍋加埋其他材料就叫石鍋飯🤦‍♂️.總體嚟講，真係好失望，係絕對唔會同朋友推薦嗰隻。