大勝軒丸一 (元朗廣場) (已結業)

喺大西北行完山，梗係要食返餐好架啦！咁先稱得上係完滿嘅一日嘛！我同朋友都不約而同想食拉麵，喺Openrice一輪搜索之後，俾我地搵到呢間大勝軒丸一日式拉麵店，由於到達嘅時間尚早，所以店內未見有好多食客，我地就揀左一張四人枱，好耐都未試過兩個人獨佔四人枱嘅感覺啦，坐得好舒服！餐廳推介沾麵，不過我本人鍾情於湯麵多啲，所以最後都點選左招牌之一嘅大勝軒拉麵($70)(留意，大勝軒拉麵係無溏心蛋嘅)~呢間拉麵店比較特別之處係佢麵嘅份量可以隨客人喜好而選擇，如果你當日特別肚餓，就可以揀增量(250g)，比一般嘅拉麵份量多啲，重點係佢唔使特別加錢，呢一點真係好窩心呀！味道方面，麵嘅口感偏硬(麵軟硬度無得揀，嘅呢一點比較輸蝕)，鍾意食硬身拉麵嘅朋友有福了！另外，麵身較粗，食落去有少少似係食緊韓國拉麵，無細滑麵條嘅口感；湯底方面值得一讚！濃郁嘅豬骨湯味令人食慾大振，係成碗麵嘅精華所在！我地仲嗌左一碟日式餃子($30，5隻)，味道一般，無咩令人印象深刻嘅地方。整體嚟講，呢間日式拉麵店俾我嘅感覺都係一般之作，無甚出色之處；喺芸芸眾多拉麵店嘅世界裡面，競爭力比較遜色，要加倍努力！