神石燒牛扒水產專門店 (東港城) (已結業)

今日去神石燒度食午餐，叫咗個午餐A美國極級黑安格斯牛膈肌之盛合$78，包括有100g美國極級黑安格斯牛膈肌、50g雞肉同埋50g豚肉，然後我加咗$8要一罐可口可樂，服務員話俾我聽返沙律湯係自助形式，盛惠$95。我有少少懷疑，點解$95？之後我望張單，明白晒！原來有加一，不過飯、沙律、湯、水都係自助形式，咁點解要加一？但係我好快就已經解除左呢個疑問，因為我哋去食自助餐都係要加一！白飯就任裝，而且有飯素可以加。沙律呢就係粟米或者係椰菜絲，有幾款醬料選擇，芝麻醬、千島醬等。講吓個主菜先，有一條雞，個size大約係四分之一塊雞扒，豬都係，牛就大少少啦，真係少少。三款食材都覺得份量少咗啲，覺得唔係好抵食。切咗細細舊牛嚟試吓，好食喎，肉質又夠林，又夠香，而且仲有啲肉嘅甜味，即刻加返少少分，而其餘兩款都係好食，總括嚟講佢嘅味道係好食，只不過份量少左啲，我相信會再嚟食，不過就肯定唔會叫午餐。😅