聖誕節其間需要，指明要叫$358既套餐，我地四個人都考慮緊叫一個set好還是2個set，最後決定2 Set係冇錯既，因為份量係極少，繼續睇落去就知😂🤝
第一碟黎既係牛油果蘋果青瓜沙律，一見到佢個份量真係當堂嚇一跳，然後得啖笑，四個人係完全唔夠食，每人得兩舊，味道方面都係不過不失。
而右手邊兩張圖嘅前菜，我想講明佢係最後先黎，邊有人食晒所有主菜後先上前菜😂😂？係上菜分配上真係處理得好差，全部都係黎一碟食一碟，而且，留意番其實每一碟的份量都係二人set，而佢真係得兩隻雞翼咁多😑😑😑
白酒醬烤雞翼，冇白酒味，係沙律醬味，微溫💩
蟹籽玉子燒，雞蛋都幾滑，味道都唔錯，應該係岩岩整好。
是日餐湯，好甜嘅羅宋湯，冇蔬菜係入邊，不過有啲忌廉拉花，但因為碗湯唔係好熱嘅關係，啲忌廉都溶唔到。
蟹肉&蝦米紙卷，賣相不置予評，入邊嗰啲粉紅色粉藍色嘅粉係完全冇味💀個醬汁係柚子味，兩樣嘢完全唔夾，完全唔知自己食緊乜。
左上：Boom! Monster，好可愛既飲品，100%香口膠味，飲慣左都可以接受。
右上：Thunderstorm，荔枝味嘅沙冰，但點解荔枝味係黑色👹？最好飲，最正常係佢，淡淡的荔枝味，唔會太甜。
左下：Hot Children Herb，粉紅色嘅水果茶，入邊有一兩粒菠蘿肉，都算係最好食嘅嘢😂😂
右下：Girlboss Soda，又係香口膠味，一杯化學飲料💀
香煎西班牙豬腩肉配玫瑰莎莎，薯蓉，烤蔬菜。賣相方面都唔錯，topping係青蘋果🍏唔係好夾，豬腩肉叫做烤得幾香，蔬菜都係，有薯蓉墊底。
烤大蝦田園沙律，如何定義為佢係一隻大蝦呀救命？就算係兩個人食都完全唔夠分啦，我哋四個人每人真係得鼻屎咁大粒thank you! 而且一上碟，已經聞到好大浸蝦嘅腥味🙈 同埋我哋食完隻蝦，沙律都未食嘅時候佢已經收碟，重點係我哋完全唔知佢收左😫
意式龍蝦海鮮薄餅，龍蝦係邊度？我係食完睇返Menu先知佢有龍蝦😂😂😂 啲海鮮細到無倫，好普通嘅Pizza，個重點又來啦，兩人份量點解係三塊pizza？
Girl 海鮮拼盤，海鮮唔算特別新鮮，但最少蝦係唔梅既，扇貝個粒肉都幾迷你，味道方面普通。另外呢個拼盤係配左一個西芹八爪魚沙律，我想講唔係樣樣野放埋一齊就叫做好食，八爪魚沙律又點解會有條西芹同檸檬呢？三樣野加埋一齊九唔搭八，你淨比八爪魚我都冇咁嬲🙈🙈
海膽忌廉意大利粉，完全表現出咩叫做孤寒，海膽份量就真係圖中個小小一篤，而且佢係苦嘅，但個意粉嘅味道都算唔錯嘅。
Lady 煙肉蘑菇忌廉意大利粉配62度溫泉蛋，叫做比較OK嘅意粉，不過都冇乜特別好食。
流心芝士龍蝦三文治，算係全餐入邊最好食嘅一個，三文治啱啱烤起好香，芝士分量足夠，都有龍蝦肉係入邊，而且係有龍蝦味既😂
烤大蜆焗薯蓉，啲蜆其實好細隻，絕對稱唔上叫大蜆，而且蜆肉都幾腥，薯蓉都OK都幾滑。
食到尾唔知佢係咪見我哋有啲可憐，比咗兩包零食我哋，話係聖誕禮物🙈🙈🎄🎄另外都有個貼心位，佢見到我朋友返嚟，佢先知靜靜雞上蛋糕😂謝謝你🤣
總括而言，價錢貴之餘，份量亦唔合比例，例如係蝦沙律同埋pizza，即使佢每一碟係二人份量，都冇可能咁樣配搭吧（？）而且所有食物份量都好少，仲要係唔好食，完全搵唔到理由可以再嚟食過，如果你硬係要過嚟試嘅話，準備後悔既心情同銀包吧🙈
