咯咯雞韓食店 (亞士厘道) (已結業)

份量少！本來同frd其實諗往食牛角嘅，但無可奈何當時係dinner time，自己又唔記得book位、加上牛角實在太多人等位，行咗一陣，見呢度有位，就選擇咗食咯咯雞。一入到去服務員安排咗我哋入去坐，俾咗一細碟醃蘿蔔我哋開下胃，連芽菜、泡菜呢啲基本前菜都冇，前菜方面比其他韓式餐廳相比少得可憐，見到啲menu其實都多選擇、幾吸引，不過可能期望越大，失望越大。味道好普通，嗌咗半半炸雞——鹹蛋黃味同埋甜辣味。炸雞一上枱嗰下嚇親，勁細份！其他舖頭嘅炸雞起碼都係炸全雞，有唔同部位，有雞胸，有雞髀⋯⋯但呢度剩係得雞翼同埋細雞鎚，一份炸雞，根本就等於其他餐廳嘅兩份炸雞嘅分量。海鮮鍋入邊有即食麵、幾隻蜆、一隻蠔、一隻蝦、幾隻八爪魚，都算係新鮮嘅，蝦肉好彈牙，但係成個感覺上就係普通嘅即食麵入邊加咗啲海鮮。我會覺得同一個價錢，喺附近其他食過嘅韓國餐廳可以有更大嘅份量、更多嘅味覺享受、食物體驗人均$100above 但淨係可以食到1-3件雞翼/細雞槌、幾啖飯、幾啖麵，係完全唔飽嘅，過咗去隔離食車仔麵。成個體驗好失望。