芝樂坊餐廳

夜晚約咗兩個舊同學食飯，其中一人提議去美國過江龍餐廳Cheesecake Factory，估唔到登陸多時，都仲係要排隊排好耐。有個舊同學唔使返工，佢六點半左右就已經嚟到等位，但係我哋最終都成九點先入得😑。食物價錢係偏貴，不過份量多，所以計返都OK。我哋小食叫咗釀蘑菇同埋水牛城香辣雞翼。蘑菇味道正常，至於水牛城雞翼我就覺得好重口味，好在有旁邊嘅西芹中和一下，雞翼份量有成12隻，兩個人食的話會太多。意粉我哋要咗香辣路易斯安娜雞肉蝴蝶粉，聽個名唔知乜嚟，不過見係蝴蝶粉就叫咗。上碟後發現雞肉係炸雞肉，有三大塊，不過口感比較乾身，而且雞肉好鞋口。蝴蝶粉就冇乜特別，個汁少少辣。最後嚟得呢間餐廳就梗係要食返舊芝士蛋糕啦。款式實在好多，我哋出去望個蛋糕櫃亦都係好繽紛嘅。我哋揀咗Red Velvet，切開後造型就唔係好吸引，不過味道就幾好，三個人好快就食晒。整體來講，所有食物味道都正常嘅，件蛋糕就好少少，加上份量的確係多，啱一大班人嚟食。不過要排幾個鐘頭先食得，就真係冇咁嘅價值。