火五越式牛肉粉專門店 (華生樓) (已結業)

與同事一齊去太子做完嘢，正想搵地方食嘢，經過火五越式牛肉粉專門店，同事知道佢哋價錢經濟實惠，份量又多，另外食物質素亦唔錯，於是乎就入座食完先走。餐廳裝修簡潔，乾淨企理。越式花膠老火雞湯河粉：有數塊花膠，滑溜有口感，雞肉有彈性，食落有雞味，湯頭清澈鮮甜，濃郁不油膩，河粉索晒雞湯又滑又鮮甜，加埋洋蔥更能提升口感和味道！香茅美國黑毛豬扒油香飯：豬扒切至厚薄適中，用以香茅為主嘅醃料醃過，肉質入味有口感。油香飯金黃色粒粒分明，食落有好香嘅黃薑味。原隻大蝦長春卷三件：春卷包得又幼又長，裏面包住原隻大蝦，外層香脆，餡料超級彈牙！蜆港吉列炸蝦餅：炸蝦餅夠晒彈牙，加埋甜酸醬一齊食，外脆內彈好惹味！