阿元來了 (鴻圖道)

觀塘嘅阿元來了已經開咗好耐，今日終於有機會試吓！上次夜晚嚟食，發現晚餐嘅食物選擇比午餐少啲，所以今次下晝嚟，就可以試到蚵仔麵線同蛋餅啦！

🌿阿元魯肉飯 $42

顧名思義，阿元魯肉飯就係阿元來了嘅必食招牌魯肉飯。醬甜肉香嘅滷肉配埋滷蛋同小白菜，真係好有台灣風味！個人認為如果飯多啲仲好，因為個滷肉實在太「送飯」😛

阿元魯肉飯

$42

🌿 蚵仔大腸麵線 $40

由於之前去台灣食過嘅麵線一試難忘，所以嚟之前我非常期待呢個麵線！雖然冇想像中咁好食，但阿元嘅麵線質素都唔差㗎：麵線口感豐富，相比台灣較硬同粗身，蚵仔新鮮大粒，大腸就較薄片同咸。

蚵仔大腸麵線

$40

🌿 肉鬆起司蛋餅 $30

蛋餅相比其他食品就普通啲，不過呢度嘅醬汁幾好食，又有辣汁，點少少一齊食會開胃啲。

肉鬆起司蛋餅

$30

🌿 芋泥蛋黃卷 $30

呢個芋泥卷意想不到好食！雖然係炸物，但唔會好漏，芋泥餡夠香綿，配埋蛋黃仲多咗咸香味，值得一試！

芋泥蛋黃卷

$30

🌿 鹽酥雞 $37

鹽酥雞有胡椒鹽香，亦夠香脆，無骨又可以一啖食哂，非常方便！唯一唔好就係份量比較少，得十小舊左右，唔算好抵食。

鹽酥雞

$37

🌿 九份芋圓 $32

三色芋圓彈牙好味，入面有芋頭粒，口感豐富，非常推薦！

九份芋圓

$32

🌿小結：

總括嚟講，阿元來了嘅食品都非常有台灣風味，想食台灣嘢嘅時候，就可以嚟呢度過吓口癮😆不過以食物份量同價錢嘅比例嚟講，唔算好抵食，平均每人要叫一個小食同主食先夠飽。