韓牛韓式燒烤 (已結業)

任飲任食嘅韓燒放題，都有好一段時間無食喇。因為我A姐要減肥！我要減肥！我要減肥！但我家M話依家做gym，要增磅練大隻，所以就要做食肉獸啦。所以我哋今日就去咗旺角韓牛韓式燒烤大食一餐，估唔到今時今日嘅任飲任食韓燒放題質素都唔錯架。餐廳係自助餐形式，鍾意食幾多就攞幾多，但就記住唔好浪費呀。除咗各種韓式泡菜，當然唔少得刺身、冷盤同壽司啦！刺身方面雖然得三文魚一個選擇，但以韓燒放題嚟講，質素都好有保證，厚切得嚟又肥美；而壽司就有唔少種類，不過，都係唔食大多飯，費事太飽肚。仲有唔少熟食選擇，不過嚟得韓燒，熟食類當然唔係我哋嘅目標啦。呢度燒烤都有好多選擇，M佬就主攻肉類，而我就主打蔬菜類，但呢度嘅海鮮類選擇就唔多喇。呢度嘅肉類全部都醃得好入味，唔駛點豉油或加鹽都好夠味。今晚主攻嘅係一口牛同牛舌，一口牛嘅肉味香濃，好有咬口；而牛舌就好鮮嫩，係我哋嘅最愛！甜品同飲品都有唔少款式，竟然仲有朱古力噴泉。