冰室99 (已結業)

今日去開炮台山，見到呢到有每位$199嘅雞煲或者烤魚食，仲有其他配料任食任飲，就覺得好抵食，就同朋友一齊入黎食烤魚。烤魚兩位一條，我地揀左食鱸魚，食落魚肉好滑，又唔多骨。食烤魚冇理由唔食辣架嘛，但因為朋友唔食得太辣，所以我地就叫左小辣，唔算太辣但好惹味。烤魚好大條，仲有好多其他材料，包括金菇、芋頭、豆卜、蕃茄等等，全部都好入味，特別係豆卜。一般嘅啤酒汽水呢到都係任飲嘅，不過我地見啲特飲好吸引，就加錢叫左特飲，跟餐叫特飲可以減$10，姐係$25一杯。我地叫左芒果香蕉奶昔同埋朱古力可可脆脆，味道香濃，飲落比較甜，好解辣。食完烤魚，我地都已經飽飽地，但都叫左啲配料食，有肥牛、菜、丸類同麵類任食。好驚喜嘅係呢到嘅丸類竟然係用振興肉丸，主打百分百原肉製造，感覺都幾落足本。另外發現原來出前一丁同呢個烤魚湯底好夾，正。