串爆

营业中

休息中

好少見既四川串串放題，有各種辣度同唔辣，既可以滿足嗜辣既人，又令食唔到辣既人一嚐四川"麻辣"燙既滋味。提供2小時任食，加$30任飲。點好串串數量後，廚房會用指定湯底淥好，再一大盤浸住湯底上枱食。叫咗BB辣，都容易入口，愈食愈有麻辣既感覺。除咗串串，各種風味小食都係任食，份量精巧，可以多試幾款，全部都係耐心醃製而成，非常惹味。例如有香辣無骨鳳爪、麻辣豬紅，少少辣但唔係嗆鼻個d。蒜泥青瓜爽脆、滷水雞翼尖亦入味。最後仲可以叫四川湯麵，同埋甜品成都老冰粉。冰粉黏黏軟軟，加埋酒釀、提子乾同山楂片，特別解辣。串串種類有好多，好似平時打邊爐既配料，肉、丸、菜類，不過串係竹籤上，容易吸收湯底既精華。以下幾款好好味，叫左好多串。鴨舌好爽口。成都小香腸，好似臘腸。雞軟骨、千層肚夠爽。蓮藕、豆腐乾、魔芋容易吸汁，所以偏辣。整體，抵食又可以過口癮，鍾意辣既朋友唔好錯過，可以挑戰辣度，一串串食仲好方便添。送菜好快手。