相聚一刻 (已結業)

經過見到呢度新開張，去八吓，見到門口有個牌寫住任食生蠔$308，好似幾抵咁，你預到我唔好彩，等我食番你一百幾十隻到時你唔好喊。佢係咁嘅，每次出一碟六隻，食完再叫，叫到你嗌停。啲蠔都新鮮肥美，味道唔算濃郁，但啖啖肉口感十分唔錯。佢呢個套餐係只包生蠔同一杯餐酒，唔包其他嘢食的。原來齋食生蠔都唔講得笑，並唔係想像中食得咁多。我冇認真數，但印象中起碼食咗五、六碟，即係三十幾隻，已經飽到食唔落了。計一計，平均十蚊隻，我應該有賺了。望吓個錶，只係用咗半個鐘頭多啲，距離90分鐘限時甚遠。但因為實在再食唔落，坐多陣埋單走人。值得一讚係佢絕無花巧，話任食就真係任食，唔會漏單唔會dum波鐘，你夠膽食佢就夠膽俾。聽老闆娘 Apple 姐講，呢個新張優惠唔知做到幾時，如果鐘意食生蠔不可錯過。