今日又趁星期三放假捐窿捐罅搵食！又再山長水遠咁入到元朗入面既天水圍，再入面既流浮山！食既係一間裝修好靚嘅餐廳，佢哋主打係任食韓式燒烤同古法窯雞，見到呢個價錢咁就梗係要試試啦！
大家搭巴士入到嚟落車就會即刻見到餐廳，一血餐廳側邊就有露天停車場俾大家泊車，又係一間駕駛者友善餐廳。
坐低左之後就有師傅幫我地setup好個炭爐，跟著當然即刻衝去攞野食攞野飲啦。燒烤食品豬牛雞應有都有既。特別值得介紹豬頸肉、牛仔骨同豬肋骨，調味相當入味，而且明顯食得出並唔係一般任食既肉質。罐裝包裝飲品都係任飲，但我地梗係斟返杯老火竹蔗茅根同菊花茶啦！
食到咁上下，新鮮香噴噴嘅燒生蠔嚟到，每一隻size都十分之有睇頭，起碼有半隻手掌咁大，再配上蒜蓉椒絲乾蔥。經典燒生蠔完全係燒烤必備冇得輸。
最後上枱既係招牌菜原隻窯雞！因為太多野要食既關係，我地起碼等左15分鐘都未食到隻雞。老闆過黎同我哋介紹，用手撕先可以原汁原味享受埋隻雞既纖維。一撕既時候，估唔到隻雞仲非常之熱辣辣，啲皮一咬落去好似薯片一樣咁脆，肉質勁新鮮一啲都唔鞋，從未試過食雞係雞油同肉汁咁勁既雞。
順帶一提喂呢間餐廳食飯一定要好有策略，因為實在太多選擇，如果唔係一早打爆左就唔抵啦！最後係雪櫃揀多條雪條就完滿結束luu。我地十分之推介大家黎呢間餐廳同黎流浮山玩返日，冬天天氣再涼爽啲一定要再黎大擦一餐！
