牛摩 (荃灣千色匯I) (已結業)

自從呢間商場裝修後就好少黎呢一度食嘢。有日約咗人喺荃灣，所以係呢間商場行下消磨時間，比我見到呢一間食牛肉嘅火鍋店，就放入口袋名單中，等下次食！而今晚就同男朋友來呢度，我哋叫咗澳洲特級和牛放題，呢個仲可以食埋美國牛肉、美國特級牛肉、豬肉、雞肉、帆立貝、青口和蝦，仲有好多配菜同小食！又長又大既澳洲和牛，油脂分布均勻，牛味濃郁，碌10秒即刻食，真係唔錯，一共叫咗差不多10盤，實回本啦！蔬菜區好多種類，特別係菇都有好幾隻！最愛佢既杏鮑菇！粟米好甜，仲有白蘿蔔，煮到最後，索左啲湯，晶瑩剔透，好淋好正！丸類繁多，其中最鐘意食係芝心魚豆腐！好滑！另外，佢既醬汁區有好多選擇，其中有一隻叫做有柚子醋，好適合減肥人士，和牛碌完淨係點佢已經好好味，仲好開胃添！呢度樓底幾高，又唔迫，都坐得幾舒服，下次同屋企人黎食都幾好！