燒肉牛蔵 (已結業)

只有做家長先感受到考試有幾辛苦，難得終於捱完，我想食餐好⋯係，無錯係我想食餐好慶祝一下，同哥哥睇完戲一落樓就見到呢間有得任食和牛，和牛都有得任食？原本都係抱着半信半疑嘅心態，不過因為我同阿仔都係牛魔王，所以決定一試。和牛佢有兩款，講真兩款食唔到太大分別，但因為兩款都係超級香，入口即溶，充滿油脂，和牛果然係唔同啲，真係好好味，但我自己覺得和牛始終油份比較多，配白飯食一流。出邊去日本餐廳叫一碟和牛都幾百蚊，咁呢度其實食返幾碟已經抵番條數，所以如果鐘意食和牛，呢間餐廳真係一個唔錯嘅選擇。燒海鮮有蝦有帶子，同埋有我最鍾意嘅多春魚，多春魚燒起嚟要少少技巧，要燒耐啲先好燒另外一邊，同埋真係要留意火。最後當然唔少得食甜品啦，雖然已經好飽，但係有唔同嘅飲品雪糕都係任食，小朋友最開心有韓國雪條，而我梗係食movenpick 雪糕啦，不過雪糕就係一人一杯，出邊嘅雪條先至係任食，不過因為食和牛已經食咗好多好飽，雪糕一杯就夠，總括嚟講呢餐真係非常滿足，由1.30pm食到差不多4pm，真係飽到連夜晚個餐都食唔到了。哈！