利寶閣 (已結業)

放假同朋友食飯，朋友話想食中菜，不過人少嗌小菜又比較困難，咁啱知道呢一間位於觀塘嘅利寶閣，可以食到豐富嘅中菜放題，一於去試下。晚市唔算好多人，坐得都算舒服。有超過五十多款嘅選擇，涼菜、炸物、小菜、甜品都有，非常豐富。首先梗係要試下呢度嘅重頭戲片皮鴨啦，會有一個師傅會喺出面即切，片皮鴨好新鮮，鴨皮燒得好香脆，肉質鮮嫩， 加埋京蔥同青瓜食，非常好味。至於呢度嘅乳鴿都唔錯 ，香口得嚟都幾大隻，啖啖都係肉，不過就略鹹咗少少。至於燉湯就一定要試下呢盅佛跳牆，採用咗大大隻嘅花膠同元貝，飲落好足料，甜得嚟仲好滋潤。呢個芝士焗龍蝦嘅份量都好大，大大隻龍蝦足足有最有手掌咁大，肉質好彈牙，而且調味剛好， 襯埋伊麵食一流。至於其他小菜都幾好，份量以一位去計算，落單嘅時候可以注意一下，咁就唔使嗌太多，但又可以試到唔同嘅款式。