串Grill 自助燒烤專門店 (譽發廣場) (已結業)

想食串燒但係又唔想自己落手煮，黎依間串Grill就啱哂啦！串Grill主打懶人串燒，限時任點任食，串燒放落有齒輪嘅爐上，就會自動滾動，唔洗自己動手燒，夠哂方便！ 餐廳位於大廈中層位置，靠窗嘅座位可以包覽到熱鬧嘅街景，而且非常寬敞，坐得好舒服~  以QR code黎落單，餐廳建議唔好點多過3盤，驚啲野食放得太耐會唔新鮮。點開黎睇發現串燒嘅種類非常繁多，唔同肉類嘅部位都有。個人最中意牛舌，有口感又好香口，和牛牛柳同埋西冷嘅肉汁都好鮮甜。  丸類方面，台灣腸、蝦卷、燒賣係我嘅至愛，最中意燒完之後外皮焦焦嘅感覺。 另外仲有棉花糖同埋雞蛋仔，雞蛋仔燒完後外脆內軟，蛋香味濃郁， 飲品任飲，食完最後仲有一人一杯雪糕~ 本身以為要燒好耐先熟，但係原來個爐好夠熱，唔洗好耐就熟，可以食到好飽！