龍鳳祥餃子館 (已結業)

去佐敦白加士街就只為澳牛？當然唔止，隔幾個鋪位其實有間細細地主打東北菜的「龍鳳祥餃子館」，有餃子有麵食，質素唔錯，又有特色，價錢又唔貴，下次去澳牛之餘可以考慮下呢間。招牌作餃子雖然得7種口味，但可以選湯餃或煎餃（要加錢），湯餃又可以再加錢轉特色湯底，又或者都係加錢加麵底，甚至雙拼都得，總之就非常彈性，加錢就得。心多人最啱食肉三鮮（$45），三鮮係豬肉、韭菜、蝦仁，另加左$5轉牛犇湯底。餃子一碗十隻，每隻係一口大小，唔算大，但餡料飽滿，韭菜好香，餃子皮薄薄的，滑中帶點煙韌。有足4個牛字（哈）的湯好有牛肉味，香醇但唔會膩口，飲完都唔覺口渴，建議加錢都要試試。另外一樣就點紅燒肉拌麵（$48），紅燒肉好似瘦肉部分比較多，以為會韌，但原來都煮得好軟腍，入口即化，鹹度適中。幼圓身的麵條頗滑，加埋類似牛犇湯的拌麵汁，非常配合。涼菜好多人會點千層醬豬耳，細份（$25）、大份（$48），賣相唔係尋常見到的一條條豬耳，而係幾條疊成一塊，質感非常爽脆，味道鹹香中帶好微微的辣，作為開胃前菜係唔錯的。飲品除左汽水之外就係豆漿（$5），有豆香但唔會好甜，健康解渴。