梅丘壽司の美登利総本店 (雅蘭中心) (已結業)

聖誕節公司放早，去到大概5:30到，未有人等位，可即時入座Lucky！我哋都冇咩嘥太多時間睇餐牌，因為已經心中有數，當晚點咗：-1. 白子 - 真係一定要食嘅Item，入口即溶，清香嘅味道難以筆墨形容，配上柚子味撲鼻嘅醋加埋啲海澡嘅食，包食過嘅朋友一定會讚不絕口。2. 左口魚 - 魚肉爽口彈牙，一口咬落去充滿油香。3. 吞拿魚腩壽司拼盆 - 呢個又係必食Item，由赤身入口香濃魚味、中トロ已經入口甘香，同大トロ入口油香即溶嘅組合，魚肉厚薄適中，Size令你滿足。4. 原條池魚刺身 - 魚肉香、油份足，最重要係切法，件件厚切，入口先可以充份品嘗到魚肉鮮味。5. 肌子 - 醃製過嘅銀身魚，有啲似鯖魚。6. 白飯魚 - 呢個真係唔係成日有，上次嚟想點都冇。真係要詞窮...用到有魚味，白飯魚仔真係有一股佢獨有嘅魚味，輕微嘅甜甜哋，要一口連紫菜食就可以感受到。是晚仲點咗2次美登利清酒，飲落清甜，甜味會留喺喉嚨久久不散，同壽司、刺身絕配。呢度嘅壽司飯食落醋味香甜，黏度適中，飯量比較細粒，唔洗食幾件其實係食飯食飽咗。食咗大概個幾鐘，走嘅時候目測門口已有超過二、三十人等位。