近排係網上見到報導，先知道呢間米芝蓮一星中菜係灣仔開咗分店，由於早前限制4人用膳，所以我就只係約咗兩位朋友一齊去試下。
一行入門口會見到與中式格調不同嘅酒吧區域，食飯之前可以先同朋友飲番幾杯先入座
1
餐廳環境格局幾優雅舒適，每一張枱仲會放置一盆綠色植物作裝飾，令人感覺心情放鬆
1
第一道係前菜燒味拼盆，分別有極品蜜汁叉燒及醬燒脆皮乳豬，叉燒真係如其名係極品，肉質超級嫩口，食落有蜜糖味，又帶點焦香，而且唔會太多肥膏，非常推介！乳豬豬皮香脆，不過個人略嫌比較少肉
之後上嘅係茶壺竹笙松茸清湯，同一般中湯唔同嘅係，佢唔係用碗或盅上，竟然係用茶壺同茶杯上，飲時要用茶壺倒出，味道幾清香，唔會太鹹，雖然餐廳好細心咁將湯渣整碎，可以由茶壺咀倒出，但係仍有湯渣堵塞嘅情況出現，有少許不便
接住係灣仔店限定嘅菜式鮮露筍油泡大虎蝦片，虎蝦已經去殼，蝦肉好爽口彈牙，味道比較清淡，但係連埋虎蝦頭嘅蝦膏一齊食就啱啱好喇，仲好啱送飯添~
另一道同樣係灣仔店先有嘅係巧手醋香黑豚肉，黑豚肉表面有一層微微嘅炸粉，再沾滿酸酸開胃嘅黑醋汁，真係幾惹味，咬落肉質軟腍，令人想食多幾舊
前幾道菜都係肉同海鮮，所以都要均衡下，嗌番個鮮杏汁杞子百合浸時蔬，每一條菜都帶有淡淡杏香，同百合嘅香味好夾，可以中和油膩感
因為想食飯，但係又唔想食白飯，所以就叫咗呢個窩燒滋補竹絲雞炒飯，係打開瓦煲前，店員先將半小碗嘅花雕酒，沿住瓦煲蓋邊倒上，等花雕酒可以流入煲之餘，又會造成好大煙。店員好貼心咁幫我地分好飯，而呢個炒飯一睇就知好足料，因為材料同飯嘅比例係不相伯仲！材料包括有蛋絲、雞肉絲、松子、青蔥碎同杞子，每一羹都可以食到各種材料同飯，口感好豐富，而且每一粒飯粒都沾滿油香，好食！
最後當然有甜品啦，分別有黑糖桃膠薑汁3.6牛乳奶凍同炸杏片香芒卷，個人比較鍾意前者，奶凍質感滑溜，微微辛口嘅薑味齒頰留香，同時桃膠亦好滋補養顏，完美！後者則會引發笑點，因為一咬，芒果餡料就會唔知係邊到漏出，哈哈！酸甜芒果味好清新，不過就有啲蓋過咗杏仁片嘅味道，整體都算不錯
