ZENTRO (已結業)

尋日同男朋友去左中上環行下街，係openrice上面見到有人推介上環有一間lounge有串燒有飯食，所以就去試。我地去個日撞正假期前夕，間吧超多上班族，同埋我估間餐廳平時都係主打做飲酒多，啲枱唔係太大張。坐左一陣，就揀左兩個set，一個蛋包飯同安格斯牛配薯菜。但係坐坐下，可能因為餐廳半開放式啦，即係有開窗篷，個到有唔少上班族患呢個「呼吸」綜合症，令我覺得環境本來幾好，𣊬間覺得好差，叫左嘢食無辦法啦，都唯有食。套餐有餐湯、沙律同汽水，餐湯係羅宋湯，都ok，個沙律都正正常常。蛋包飯個蛋係滑蛋，加上個日式咖哩汁都幾好食，不過個吉列豬扒都幾鞋，唔係太好食，淨食個咖哩蛋包飯係ok ge。至於個安格斯牛，我地揀左5成熟，但嚟到明顯唔係5分，不過都無所謂，反而佢個牛扒的味，真係一般，我覺得如果一塊靚扒就咁加鹽可能仲更加好，不過個薯條係ok的，佢唔係好似一般薯條咁加鹽，而係加胡椒，所以都幾好食。不過整體來講，佢啲餐妹仔大過主人婆，配料好食過主菜，而且「呼吸」綜合症問題，未必個個可以接受，我奇怪點解無咩人講，或者因為啲人平日食，少撞到上班族chill out la。