樂天大喜屋 (已結業)

今日經過創興廣場搵食，見呢度個放題好似好多嘢食咁，就俾呢個咁豐富嘅餐牌吸引咗入去。魚子醬拖羅甜蝦波子壽司，波子壽司賣相可愛，圓形一粒粒好似粒波子咁，甜蝦選料新鮮，配合魚子醬嘅味道作出適當嘅提鮮，非常好味。脆炸貓山王，貓山王嘅榴槤味果然零舍唔同，炸得脆身得嚟又唔會話太油，出色。鹽燒牛舌，牛舌厚切更顯口感，牛味比起其他餐廳嘅更加高上一個層次。沖繩黑糖牛仔肉，呢一樣作為樂天大喜屋嘅精選食物實在最合適不過，牛仔肉本身已經相當juicy，可能落咗沖繩黑糖嘅關係，味道份外細緻。焗孜然黃糖雞翼，孜然嘅味道同雞翼呢個配搭，正宗得有點像食緊重慶燒。吉品鮑汁燴花膠盛宴，盛宴裏面堅秋有大大嚿嘅花膠，花膠炆得好林，索盡吉品鮑汁嘅味道，正啊。泰式燻蹄，燻蹄個厚度大約係平時燒臘檔嗰啲燻蹄嘅四倍，更見口感，點一點個泰式醬汁，更有風味。朱古力布朗尼，呢度嘅甜品都相當有質素，其中我最鍾意嘅係呢個朱古力布朗尼，朱古力味夠濃之餘口感又夠鬆，唔會話太硬，我前前後後食咗成四五舊。侍應姐姐喺百忙之中都會同我哋傾下計，問下我哋對食物質素嘅意見，值得一讚。