全餐最滿意嘅係前菜，有泡菜，黑豆同芽菜。泡菜酸辣適中，黑豆香甜，芽菜就小咸，都幾開胃。
主菜我哋叫咗韓國山野菜大醬拌飯。上枱時，配料，大醬同飯係分開上嘅，等我哋就住自己嘅口味拌飯。配料有四種食材，包括芝麻葉，細葱，紅蘿蔔同秀珍菇。我哋先試咗大醬嘅味，一試上口我同男朋友就覺得個味唔係好啱我哋，得咸同酸嘅味，比較偏酸，完全無豆香。不過都叫咗，點都要拌入個飯試下。我哋將三分二份大醬同所有配料拌入個飯，個拌飯一入口就好大浸草青味，連埋個偏酸嘅大醬，真係怪怪哋，令我哋完全無意慾繼續食。我哋好努力咁食，最後都係食咗一半乍。
另一個餸-烤手工製牛肉餅伴年糕配蜜糖醬油汁-又係招牌菜，睇食評都有唔少人推介，點知又係令人失望。中肯啲講，其實個牛肉餅係有牛味，但真係好乾！又乾又嚡，真係令人腳步。我哋最係又係食唔曬個牛肉餅。反而個配菜-煎年糕正正常常，我哋有食曬。
整體嚟講，今次都食得幾失望。因為諗住有咁多好評，又係試招牌菜，應該幾保險，點知都同期望嘅落差幾大。如果大家會去首首到食，建議大家試其他菜式！
