土耳其轉轉燒肉 (已結業)

　　第一次路過見到佢裡面無乜客，勝在誠意搭救、有善拉客，所以我收左外賣單。初初唔知咩係轉轉轉烤肉，淨睇價錢只係覺得貴。後黎去油麻地食到同一樣野，價錢差唔多，碟頭都幾大，所以又膽粗粗試埋呢間。　　以外賣計，其實呢間比油麻地某店仲貴。我唔識分正唔正宗，而且我認為，岩口味先係最重要o既。油麻地某店o既羊肉卷(羊肉卡巴)傾向溫和豐富o既口感，而呢間店D野就比較香口惹味，刺激感比較強烈，佢地個辣汁真係食到有辣(要加辣應該可以好辣！)，唔止係香辣椒味。　　今日去買o個陣似乎有人包左場。我一行入去就知道佢做唔到門市，廚師見到我，我話要take out 希望佢做埋我生意，佢竟然識用廣東話答我而且仲講得幾準！最後當然係買到啦！　　我自己食左半份，覺得醬汁好足，羊肉粒比較乾身，唔知係因為烤過火定係預切累事啦(唔係即切)，但整體黎講都okay值40蚊(我鐘意油麻地o個間少少，然而，呢度都可以係一個選擇)；羊肉唔算騷，相信曾經因為羊騷而唔幫襯羊肉卡巴o既食客都可以一試。我男友就認為呢間味道岩佢多D(相比起油麻地某店)，認為物超所值咁話！(我知道佢唔會寫，所以我代筆！)　　呢間只係一家小餐廳，睇佢舖面似乎都幾新