李景粥品專家 (已結業)

由生記到景記到而家的李景記，景叔轉工真係仲多過好多人，起碼多過我先。呢度人氣好盛，今日落灣仔做野，吃過Q版就再來這裡食粥。近一點已經坐無虛席，一間店若打出名堂係旺好多。一個人都要等一等至坐得低，呢度地方唔大，檯櫈擺到密一密。呢度同以前幾間粥舖的分別是較新淨，有電視睇，同阿景叔會著廚師服同戴廚房帽在煲粥，幾掂的。叫了咸雞脾粥，要杰底。碗粥個碗無以前咁大，但仍舊夠份量，粥底幾綿滑，同以前沒有什麼分別。當然沒有味精，個人覺得以粥底來說這裡的是最好的幾間了；咸雞脾仍舊好味又夠味，又啖啖肉，雖然要36蚊一碗，但都是物有所值。見店內沒有油鑊，心想油炸鬼應是別處交來，加上時近中午，油炸鬼都擺左成朝，所以都無謂試；腸粉賣相麻麻地，炒米亦不見佳處，就要了碟魚皮，雖比旺角的妹記略遜一籌，但亦新鮮爽脆。習慣食魚不點豉油，在吃魚皮時那碗薑蔥豉油就大派用場，加胡椒粉來點好正。埋單五十幾蚊，一點都不便宜，但吃靚粥靚料，係要俾貴少少的。