藍屋餐廳 (已結業)

樓下位人兄都幾好笑，人地咁好心機打篇食評出黎，都會俾佢質疑係假食評，難道淨係要彈先叫真食評嗎？我覺得每個人的口味不同，唔使話人地寫既野係疑似假食評咁唔尊重呀！認真無奈。今日行完動漫展，見肚餓又再去幫襯下藍屋餐廳，上次同個老細傾過幾句，估唔到佢竟然認得我，而且仲招呼得好周到添，抵讚！我同朋友點左個厚旦碎鮮牛三文治、鴛鴦炒飯加奶醬脆豬仔包。(兩個下午茶SET，飯散叫，跟三杯凍檸茶)厚旦碎鮮牛三文治好特別，好少在其他茶餐廳見到有賣，同一般食開的旦牛治好唔同，味道亦唔錯，值得推介！個鴛鴦炒飯不過不失，同普通酒樓做出來的味道冇咩分別，不過份量好多，女仔實食唔晒，要兩個或以上SHARE。最後，個奶醬脆豬仔包賣相普通，但味道不錯，我的朋友話好好食，但我就冇試到。總括黎講，我覺得呢間餐廳5分滿分最少都有3.5 - 4分，灣仔區黎講算係唔錯啦，最緊要係佢裝修都好靚，而且乾淨又坐得好舒服，好過灣仔街市附近D舊式茶餐廳啦，以後經過灣仔一定會再去幫襯！！係呀，今日個老細話餐廳已安裝了有線足球頻道，8月開始會延長營業至凌晨三點，太好了，下次同班FRIEND在灣仔約睇波唔使淨係去酒吧喇~~~