Soho Viet (已結業)

前兩個禮拜食完呢間舖頭，覺得幾好食今次返兜。上次我食咗個牛肉丸湯做前菜，今次我跟大少一樣食沙律。個沙律辣辣地，上面嘅燒肉我覺得今次多咗肥膏一啲。沙律汁個味唔係太討好，如果有少少酸味比較開胃，應該會好少少。上次我哋兩個都係叫牛肉河，今次大少決定要肉碎飯。個牛肉湯河上次已經介紹過，今次唔再介紹反而我想講嘅係大少嗰個肉碎飯.肉碎飯，我諗住會係傳統嗰啲有好多香草basil葉，再加魚露炒落去嘅肉碎，點知我食咗一兩啖完全冇香草嘅味，亦都魚露嘅鹹香，更加唔好講青檸汁嘅酸味。真係有少少失望😞。我估呢間餐廳最好食嘅都係佢嘅生牛肉河㗎啦，其他嘢冇試過，希望下次試完對佢有另一種新睇法。