HAND3AG (K11購物藝術館) (已結業)

經過間餐廳門口俾個裝修吸引咗入去食，主題係白色嘅裝修，好似好乾淨同埋好似cyber，見到啲食物都覺得同健康有關係，感覺係一間健康食物嘅餐廳。我揀咗HK紅白藍鐵板三文治（材料：安格斯牛肉漢堡、蕃茄、羅馬生菜、炸洋蔥圈、流心芝士、羽衣甘藍沙律、H3燒烤醬同埋藍芝士醬）見到三文治嘅時候一定會被向外觀吸引住，感覺好豐富、好好食、好靚、頓時食慾大增！當我第一啖嘅時候，咬唔開？！我以為佢嘅麵包係烘過，咦，真係烘過，但係點解唔脆嘅？佢嘅麵包質地似唔係即時烘的，似烘完攤凍咗先用嘅感覺，所以個麵包好韌，而且個麵包仲要好濕，可能係食材裏面嘅水份，例如佢食材裏面有沙律、蕃茄、羅馬生菜等等，可能佢哋無瀝乾水份，所以搞到個麵包濕咗，就更加難食，非常扣分。我當初係俾個藍芝士醬吸引咗，但係我食唔出有藍芝士味？唔知會唔會係俾個燒烤醬蓋過咗？所以今次嘅體驗比較差，不過我會再俾多次機會佢，睇吓佢下次係咪都係咁！