咁岩公假，冇午市優惠，唔知係咪咁少左人幫襯啦。但都無阻我地幫襯佢。
叫完餐，朋友啲餐都一個個黎曬，等到佢地就黎食完，三十幾分後，先黎我個餐，我個肚都餓到打曬鼓。一見到我個日式炒麵終於到，真係想大快朵頤，點知.....個麵表面到有大大張紙！！！
唔係我食食下，喺底到搵到，係一眼就喺個表面發現到。究竟係想點，廚房果個上菜盲左？個侍應麵盲埋？成間餐廳冇咩人，炒個麵咁耐，仲可以咁俹簁！見到張紙，已經舉手叫個侍應同佢講我要投訴，佢第一反應係幾好笑嘅，佢講左句：「唔好啦～」佢又幾可愛啵🤣🤣，但訴我都堅持要投囉。
佢本身想同我換過一個就算，點可以算？！我餓到就癲，竟然畀「紙」我食。
佢話幫我叫店長，順便收走我個炒麵，唔知佢係咪想毀屍滅跡，佢攞走前我就同佢講我影曬相架啦。
個店長到左，都係講句唔好意思，話廚房落肉嘅時候唔小心連埋張紙落去炒。
其實講咩都得，可能真相係擦完廚房張紙唔小心落左去都得。然後個店長，都想換左個餐當冇事，問題係我完全唔想再喺到食任何野。我未投訴都落紙，我投訴完係咪畀痰我食？
佢根本冇處理到客人嘅不滿囉。我同佢講想向佢地公司投訴，佢搵左勁耐，先寫左個電話畀我。個電話本身係9字頭嘅，後來佢話搵到卡片，咁個卡片就3字頭嘅，仲要公假打唔到，要我等到星二（7/4）先打到去投訴，大家知佢地幾正啦。投個訴都要個客等，正到呢.....
其實等佢搵卡片畀我時候，我已經去左佢官網打投訴信，但直到我宜家（7/4）喺OpenRice再鬧爆佢，都仲未即時處理我個投訴，就知佢地幾無視客人嘅投訴，不如考慮摺左佢？攞埋將客服卡片，我某朋友叫嘅雪糕都仲未黎，個雪糕唔知係咪邊到空運，塞緊車....最後緊係取消左啦。
投訴完一大輪，我啲朋友都食完，個店長先講話free左我地張單。但咁樣唔代表我唔會再投訴你地店囉。
喺喱間餐廳搞左成個鐘，我一粒米都冇食過，要再去出面求其買野食。
就算我冇畀到錢，但時間都浪費曬落喱間餐廳到囉！
喺到返工返學嘅你哋鐘意浪費時間等佢啲唔知有咩垃圾附送嘅餐，隨時光臨。
