坐低首先有個開胃沙律, 新鮮椰菜配上芝麻醬再加上七味粉, 幾惹味!
我哋經店員介紹先嚟個是日精選赤睦魚剌身, 肉質綿滑無筋,魚油都豐富但又唔會覺得好油膩, 至於個炸魚骨就更加無得頂同無得剩!! 佢很醜但是很脆口！！連檸檬汁都唔駛落, 我哋就連魚鰭魚尾都吞晒入黑洞!!! 我一向唔係幾識食魚頭, 但朋友話好好味, 咁我又試吓啦, 一食就連渣都無啦, 因為入口完全唔會覺得D骨剌口同硬, 魚骨炸得好香好酥脆, 亦都毫無油膩感, 廚師調味做得剛剛好, 唔需要再額外點任何醬汁!!
1
今晚主角特上漁獲浜燒盛合同我哋見面啦!!! 呢個盛合有龍蝦, 帆立貝, 蠔, 鮑魚, 松葉蟹腳, 所有海鮮都好新鮮, 隻鮑魚仲響度跳扭腰舞咁! 店員細心講解點樣燒D海鮮係最好食, 為免我浪費大好食材, 所以都係由店員代勞吧。
松葉蟹腳 – 輕輕燒吓, 唔會燒到乾晒無水份, 食落肉質鮮甜夠嫩.
燒蠔 – 店員提議燒到5-6成熟就最好食, 當然照跟啦…果然蠔肉肥美, 夠晒鮮味!
帆立貝 – 可揀牛油或者清酒煮, 因為我怕牛油會感覺好漏, 所以就揀咗清酒煮. 帆立貝肉質肥厚, 裙邊爽口完全唔會韌, 至於個湯汁好鮮甜, 又係食到照鏡啦!
鮑魚 – 鮑魚邊燒到有少少焦香，咬落中間部位仍然軟腍，點少少柚子胡椒醬更加惹味!!
燒龍蝦係師傅燒完先再攞埋嚟嘅, 個醬汁係用麵豉撈埋龍蝦膏, 睇個樣以為會好咸, 點知原來唔係, 咸淡度剛好, 龍蝦啖啖肉, 肉質紮實爽口.
朋友仔平時都愛飲番幾杯(其實可能係幾支), 店員就推介季節限定真澄清酒, 響日本一睇到[限定]呢兩個字就好易出事, 因為執輸行頭慘過敗家, 估唔到響香港都一樣, 連平時滴酒不沾嘅我都飲番兩杯, 實在百年難得一見!! 雖然我唔識飲酒, 但都覺得好易入口, 一D都唔“拿” 喉, 飲落甜甜哋! 朋友話咁快KO咗一支, 跟住店員好用心再介紹其他清酒, 再試多兩款唔同味嘅清酒, 其中仲介紹飲真澄七號時配上螢光魷魚, 果然味道真係唔同喎!! 就咁食個螢光魷魚會覺得咸味重D, 但飲啖清酒一齊食呢, 味道會變得清甜, 好得意喎!!
再想加D嘢食, 但鍋物又怕會飽得滯, 所以每人要個海膽手卷, 紫菜脆口, 海膽份量好足夠, 味道甘甜.
都係時候要食甜品啦, 選擇困難症又發作, 到底食柚子雪芭好還是椰子雪芭好呢???? 最終唔好煩, 一人一個分甘同味吧!! 柚子雪芭好清新, 食落有種涼快嘅感覺. 而椰子雪芭就好creamy, 其實似雪糕多D, 好濃嘅椰香, 有D似飲緊椰奶咁.
整體嚟講食得出呢度嘅廚師係用心製作食物嘅, 食材亦都好新鮮, 所以唔需要多餘嘅加工調味就可以食到食物本身嘅鮮味. 當好食材遇上好嘅烹調方法, 咁咪攞您命3千囉!! 真係豪情星期一啦!!
