差不多一年前開始晚飯時間會去到佢門口，日日都會裝下裝下。見佢有時好FULL有時好靜。個bar枱格局幾吸引。不過都冇的起心肝入去試。
終於有次俾一位親切女仔搲咗入去，又好親切咁介紹幾個set，一試個叉燒，驚為天人。雖然未去到世一，但嗰種半肥瘦、厚切、淋軟、juicy、油脂潤感、煎香至剛好，配搭濃豬骨湯底同彈牙拉麵，蒜蓉同辣芽菜任夾，仲有有啲太高嘅高腳櫈，適合獨食嘅吧枱位，背後牆上嘅掛鈎，台上自己斟嘅多冰冰水同冰茶，唔會太嘈嘅音樂適度隔開其他人嘅談話聲音，單丁客人瀟灑來去嘅身影…… 全部都太啱feel。
替玉大大份都只係加$10！！！！！！！！
小龍蝦沙律、芥末蜆肉、螺肉小食都好食（夠凍）又飽肚，但日式醬偏重咸重甜，反而煎餃感覺更清新。
雖然嗰次之後偶爾幫襯啲叉燒同某些態度都失咗色，（間中有回復少少），但拉麵同湯底一直保持高水準。
曾以為驚艷叉燒可一不可再，點知近日叉燒狀態回勇，終於又好似有返第一次食個「Oiishi」特效出返嚟。
然而「人情味」永遠都係獨一無二嘅。眼神同細處往往顯現大分別。只能懷念。
記得袋定現金响身。慎防路過想食
#只收現金 #strictlycashonly
1
