老趙越南餐廳

营业中

休息中

老趙响佐敦嘅呢間老舖，不嬲都係小弟心目中數一數二嘅越南菜館...可能自小响度長大，再加埋D感情分使然la。响呢度，可以食到水準極高嘅特別金邊粉、春卷、粉包及牙車快。當然，仲有可以講係全港最出色嘅魚露...太座每次來，必定先自隊半樽。的確，做得咁入味嘅貨色，難求矣...今次前來，某程度都可算係為咗重温魚露嘅滋味。試過後，依然有水準。但是，僅此而已...從前嘅"特別"金邊粉已變成"雜錦"金邊粉。從前嘅配料如扎肉、稔肉等完全失踪，換嚟係小弟最討厭嘅蟹柳，實在豈有此理之極。可幸湯底夠清之餘依然入味，否則，棄之可也...春卷亦失去咗兒時嘅滋味。不過，比起外面嗰D超市貨色，依然略勝一籌...牙車快最重要係椰菜絲份量足，配上極品魚露，難食極都有限。雞肉肉地幾實淨，雞絲真正手撕出來，食落冇乜雪味，算係比較出色。但比起十多二十年前嘅水準，依然有距離...話雖如此，比起越棧、rice paper嗰D勞什子貨色，仍係冇得比...