泰玖 (已結業)

開左幾年openrice account，一向只係要黎訂位用，第一次食完d野難食到想即刻打番篇食評。我原本以為路德圍間泰特色已經係泰菜入面最難食，估唔到一山還有一山低，見到openrice咁多好評先試下呢間野，點知原來伏到咁。炸蝦餅，炸到過左龍，外層有d硬，裡面唔夠彈牙而且食落鬆鬆地，明顯冇乜落力撻過d蝦膠，而且真係好細粒。不過36蚊就算數啦。炸雞翼，得面果層有味，入面係雪味，不過叫炸得ok，同樣36蚊，算數。泰式海鮮粉絲沙津，叫得做沙律，我真係冇預過d粉絲係熱既。而且得陣辣味，冇乜酸同其他香料味，咁都叫泰菜？D海鮮又係低質到痴線，兩舊魷魚又韌又冇味，隻蝦好明顯係超市最平果D急凍白對蝦，呢碟野收人78蚊，粉絲已經唔值錢，用靚小小海鮮得唔得？全晚最嬲係黃咖喱炒蝦，一拎到出黎碗野只係微暖，一食落去隻蝦凍既，叫佢拎番入去整過。再整出黎，依舊失望。D咖哩得個甜字，完全冇咖哩應有的香味，斷估都係只係用咖哩粉沖開，冇乜落香料炒過。蝦就霉霉地既。全晚最正常係燒魷魚，緊係正常啦都唔洗你煮，你個廚師都唔識煮野既。圖係食到最後放唔落口既咖哩（難食到撈唔到飯）加粉絲。冇下次。荃灣最難食泰菜當之無愧。