但馬屋 (新都會廣場)

营业中

休息中

突然心血來潮想去打個邊爐，即興就去左葵芳睇下有咩好選擇。行行下就喺新都會見到呢間但馬屋。望落去舖頭都乾淨企理，環境都幾舒服，一於就試一試呢間野得唔得。雖然都算早食飯，但係都要輪左一陣先有位，不過都唔算等左好耐。但馬屋主打日式任食火鍋，實行一人一個鍋，每個鍋都可以叫一款牛肉或者豬肉既，亦有多款湯底任君選擇。我地今晚主要都係叫左北海道夢之大地豚肉呢個set，而湯底就叫左三款湯底，分別有美肌鍋、意式蕃茄芝士鍋同埋甘露鍋。湯底好快上枱，我最期待係美肌鍋，睇落去唔油膩，口感幼滑，應該係雞湯底，再放中藥藥材，就咁飲都覺得好味。再黎講下蕃茄芝士鍋，蕃茄味唔算好濃，但係滾滾下湯底好越來越濃，配合肉類食材，最後個湯底好似羅宋湯咁。甘露鍋最貼近日式火鍋，因為味道最清甜，完全帶出食物本身既味道。到大地豚肉出場，北海道豚肉果然肉質鮮甜，肉味都好濃郁。值得講下既係，不斷見到店員將肉類即刨即上枱，絕對唔係一早刨定。而且，啲肉去得快，先保持到食物新鮮，好味之餘，食都食得放心。其餘任飲任食既飲品同食物都有一定水準，而且仲有任食既哈根大師！