NUTTEA (葵涌廣場) (已結業)

咁啱係葵芳食野，當然要順便買啲嘢飲，咁啱行過見到呢間，之前係新蒲崗試過一次，好好飲！決定再飲呢間。見到menu多咗幾個款式，係季節限定嘅士多啤梨同埋菠蘿，仲有分奶蓋茶或者堅果奶等等。奶蓋係冇用牛奶只係用咗堅果，好適合食素嘅人飲，同普通奶蓋一樣都係咁濃郁細滑，仲多咗堅果嘅香氣。菠蘿堅果奶蓋呢個係季節限定嘅，非常清新，最適合夏天飲。茶底係用台灣新鮮鳳梨同埋茉莉綠茶打成嘅，上面有一層厚厚嘅奶蓋，飲落除咗有菠蘿嘅香氣，加埋濃郁嘅奶蓋，口感更加豐富。杯蓋有半面係可以打開，可以用附送嘅膠鏟嚟食奶蓋。伯爵朱古力堅果奶蓋茶呢個上次係新蒲崗試過，不過今次就係飲熱嘅，熱飲伯爵茶味更加濃郁。而呢杯嘅奶蓋就係朱古力味嘅，朱古力味嘅奶蓋更加香，同伯爵茶超襯！