三德素食館 (僑冠大廈)

营业中

休息中

之前食過幾次，不過都係成大班同學，人數多，兩張大枱拍在一起，所以都好難影相。今次舊同事約食飯，咁啱又揀咗三德，人數6個，我哋就揀咗個六位套餐。金湯花姿冬茸素翅羹、勝瓜黑木耳素柳片、菠蘿咕嚕素球、紅燒本菇海參豆腐、椰汁香芋南瓜煲和欖菜彩椒鮮冬菇藕片，以及另外叫多一個荷葉飯。最快到嘅係荷葉飯，大家都急不及待，因為好香嘅荷葉味，食落有芋頭粒和素肉，又香又好食，之後其他餸菜都陸續送上，素翅羹亦好清淡，好好飲，其他四款素菜都好啱我食，唔會覺得油，賣相亦好靚，追求健康素食者，又或者好似我咁，食慣清淡及追求原味，就會覺得今餐好好味好好食，不過對於食慣肉類及濃味者就會覺得無味，甚至有人覺得好似味道碟碟都差唔多。最後仲有甜品送，南瓜西米露，大家對呢個甜品都有唔同評語，我個人就覺得好清甜又好味，主要西米露嘅份量又唔會太多，粒粒分明，不過對於濃味愛好者嚟講，就覺得同個素翅羹差唔多，只係甜同鹹嘅分別。總結：無論素菜嘅味道，亦或店員嘅服務態度，三德都做得唔錯。不過價錢就要人多才會比較抵食，因為可以叫多幾樣餸，相對如果人少就會覺得比較貴。而我哋今次6人共$747，每位平均$124.5，都算抵食。