之前講過都食過一間Omakase，件燒銀雪魚壽司令我一試難忘。而我所講既就係上環既鮨燐，係朋友介紹既餐廳，而我都已經去過好幾次，都希望介紹俾大家🥳🥗🍣🍶🍵🥢🍨
鮨燐
我試左佢地既set — 10貫 & 1 卷 @$348
𩶘金鯛 - 魚味淡淡地，鮮甜，肉質有咬口
帆立貝配青檸汁 - 肉質好爽脆，青檸汁剛剛好
牡丹蝦配燒蝦膏 - 蝦味非常新鮮，而蝦膏味十分之濃郁，本人最愛
鰤魚，又叫野生油甘魚配新鮮海草 - 呢款係冬季魚，帶點甘味，魚味比前面幾款較濃味
金線鯛配五色芝麻 - 呢款其實最近呢幾年都幾流行，佢係日本紅衫魚，我自就覺得普普通通
池魚配䓤花及三升漬 - 呢個做法幾特別，立師傅話三升漬係用米，豉油同埋小小辣椒釀制而成。我都覺得呢款好好食，一D 都唔辣但又帶出魚既甜味同埋一D都唔腥。I like it!!
登登登登！
跟住就係我一試難忘既燒銀雪魚 - 呢款立師傅只係將佢較燒，但魚既油香係超正，佢冇配其他野，所以完全食到個種油香魚味，加上實肉，口感係非常之出色。
海膽 - 海膽非常鮮甜同有一種甘甘地味，入口非常滿足！
大拖羅 - 立師傅既大拖羅壽司都好細心，佢選擇左冇咩筋既部位，同埋佢用刀𠝹左面頭幾刀，食落口感覺唔會好似肥豬肉咁，入口一流，after taste 好正。
燒左口魚群邊 - 呢款又係油香十足，但本人覺得略為燒耐左小小，所以令到塊魚肉溶到細塊左同好似燶左少少，不過就幾香口。
來到最後一道，亦係我最鍾意既
䓤拖羅手捲 - 超級好味，拖羅溶都有筋，油香十足，再配埋新鮮既日本京䓤碎，齒頰留香！
總括來講， 鮨燐既立師傅主要都係用番食材本身味道去做每一道壽司，比較小加上其他材料，我比較喜歡。同埋食Omakase 最重要係客人同師傅既互動，咁客人先會可以用心品嘗到師父既心機，鍾意既朋友記得要拜候下，最緊要預早BOOK位，有時都好FULL！
