肚餓了串燒烤焗專門店 (已結業)

有一排冇食過串燒，又心思思想食吓。有朋友介紹原來亞士厘道都有串燒專門店，是夜專程去到小店一嚐串燒。小店坐位十分密集，人多氣氛不錯。枱面有調味粉俾人再加調味。飲品除咗啤酒汽水外仲可以揀熱柚子蜜，食串燒都可以滋潤一下。柚子香燒雞翼好似蜜糖雞翼咁，不過再加多一點柚子清新味道，雞翼皮脆肉嫩。秘制汁燒鮑魚啲秘制汁已經入晒味落鮑魚度，有咬口又彈牙。鹽燒安格斯牛柳粒牛味濃又軟腍，燒得剛剛好有肉汁。烤焗西京比目魚有三件之多，西京汁味道唔太濃，比目魚肉質軟滑。薑蔥烤焗翡翠螺份量亦不少，翡翠螺較少熱食，薑蔥去腥螺肉亦爽口彈牙。黑松露香菇醬燒蠔黑松露香菇醬味道幽香濃郁，燒蠔件頭不少，內裡依然十分多汁。蒜蓉燒蠔蒜香味濃，比起黑松露香菇醬燒蠔亦不遜色。醬燒牛油粟米外層的燒醬燒一燒後變成一點點啡色，賣相吸引，粟米清甜好美味。