金樂軒雞煲魚鍋

营业中

休息中

早幾日難得同屋企人入左北角，就去左試呢間聽講都幾出名既金樂軒。間鋪頭環境都幾好，乾淨之餘地方又唔會話好逼，每枱客人都會有自己既空間，原本覺得每間食雞煲既環境都好差，但呢間野就帶左俾我一個全新既印象。除左環境好之外，呢度既店員服務態度都唔錯，老闆娘仲會好好咁慢慢咁推介d野俾我地食，而且推介既野食大部分都幾抵食，唔似其他餐廳咁話推介俾你但實際上就當你係水魚。黎呢度既人多數都係嗌雞煲，不過我地就叫左個龍躉煲，因為老闆娘話新鮮喎～不過個龍躉煲都可以好似雞煲咁用個湯底黎打邊爐既，不過我地就冇咁做，反而嗌多左幾個餸諗住試多d野咁。個龍躉煲真係好好食，個湯底比想像中鮮甜，而且魚肉既份量都好足，絕對冇偷工減料，而且d魚肉既膠原蛋白都好有益，真係好味之餘又進補！我地仲叫左個老闆娘推介既香辣蟹，本身都驚好辣因為我本身唔係太食得辣，但係食落個味道刺激得黎又唔係算話好辣，就算唔食得辣既人都可以接受到。個蟹亦都炒得好香，咬落脆卟卟咁真係唔錯！仲有個尖椒炒豬潤，其實d青椒係好食過d豬潤既，可能係我個人喜好啦，d青椒係完全吸收哂d豬潤既味道，平衡番佢原本既椒青味，加上佢又唔會炒到燶哂，脆脆地咁岩岩好！