新肥泉海鮮大排檔

营业中

休息中

一排冇食小炒，今日心血來潮，來到佐敦的新肥泉大排檔麻甩一下。大排檔係佐敦官涌街市上面，晚市好旺場，格局與一般街市大牌檔無異。坐低先來自一枝藍莓。爽也！一般大排檔都要叫一大碟，人少比較難食到多款。這裏特別之處係有套餐選擇，二人成行，好方便，而且QR code落單，上菜好快！韭黃瑤柱羹滿滿一碗有好多肉絲，瑤柱絲、木耳絲等。上湯浸時蔬菜夠清綠，份量亦夠，上湯浸夠健康。豉油王大花蝦一人一隻，都幾大隻，彈牙惹味。招牌香煎金錢鱔好有驚喜！鱔煎得兩面焦香，肉質爽彈，爽脆而不油膩，入口有陣陣香脆。避風塘炒軟殼蟹炸漿不算厚，軟殼蟹炸得香脆，所以肉質新鮮，先聞到陣陣麻辣香，再食到麻中帶辣，送酒一流！招牌XO鮑魚煲混以紅椒、青椒、鮑魚菇等炒，菇吸盡了XO醬味道。鮑魚則爽口彈牙，夠惹味！最好配一碗鮑滿白飯。金銀蒜蒸蟶子又是我喜歡的菜，蟶子上堆滿粉絲和蒜蓉，所以食落蒜香滿滿。街市小炒從來很香港地道風味，加上人頭套餐的設計，令人可以少份量試匀咁多款海鮮小炒，真的很貼心，值得一來。