麗晶軒 (已結業)

麗晶商場雖然地方唔大，但係食肆都有好幾間，除咗兩間茶餐廳，就只有這間新開一年左右的麗晶軒早上飲茶，晚上食小菜。聽街坊講除咗早上飲茶唔錯之外，晚上的雞煲、魚煲都OK。晚上6:30去到，冇乜嘢客人。如果以食雞煲的價錢，係比較OK。但相比隔離兩間茶餐廳，就相對比較貴了。叫咗一個「麻辣烤魚」$228，包一碟生菜，及兩碗白飯。半條鯇魚左右，都好大條，叫咗小辣，鯇魚炸過，皮脆肉嫩，味道新鮮。另外叫咗兩個小食，花雕豬手$68 ，其貌不揚，但估唔到花雕酒味好濃，豬手皮爽口。五香牛展$68，份量都幾多，牛肉入味。這個份量兩個人食唔晒，應該可以三至四人。晚上客人不算多，但其實餐廳食物都比較有誠意，份量都很多，味道也不錯， 可能隔離兩間茶餐廳的晚市套餐價錢相對比較平，所以導致晚市比較少客人。總括來說，餐廳地方乾淨，裝修簡潔，侍應姐姐招呼熱情，如果想同朋友傾吓計，安安靜靜咁食返餐，這一間算係不錯的選擇。