龍城冰室

营业中

休息中

茶餐廳係香港嘅特色，因為茶餐廳嘅食物價廉物美，食物選擇又多，炒粉麵飯、茶餐、公仔麵餐、焗飯、小菜定鐵板餐，樣樣都有得你㗎。九龍灣淘大花園附近嘅食肆選擇越嚟越多，前兩日放工近近哋去咗新開嘅“龍城冰室”食個晚餐，呢間已經係佢哋第三間分店，之前食過佢哋嘅觀塘分店都幾有質素。佢哋新開張有一個優惠就係食滿$120就可以用$18點一個鮑魚雞煲十分之抵；唔好以為$18既雞煲會比較細碟，佢哋嘅份量同普通小菜冇分別，雞煲有三隻鮑魚，雞、洋蔥蒜頭等爆香用砂鍋上碟，非常惹味。除咗各樣單點食品之外，餐廳每晚都有晚餐選擇，$68嘅晚餐有餐湯、飲品同埋主菜，而我就選擇咗煎雞扒燒汁鰻魚意粉，雞扒係雞髀肉， 雞皮煎得香脆，而肉質算嫩滑， 義燒汁鰻魚份量唔多，但係夠好味。另外再點左一個佢哋嘅金牌焗飯， 焗飯嘅選擇夠多，我哋食咗個“焗芝士魚柳飯”，佢哋嘅焗飯比較出色，白汁加芝士配合炒飯底，焗起又香又好味。餐廳嘅自製出爐麵包亦都係另一個賣點，嗰日因為食完晚餐都已經好飽，唯有下次食早餐或者tea嘅時候先試下。