泰象館

营业中

休息中

九龍城不嬲都多泰國嘢食，今日食呢間泰象館，位於城南道，之前未嚟過，今次決定同朋友一試。我哋喺平日晚上嚟到，由於疫情關係，好多人都唔敢外出，但係呢間餐廳都算坐得幾滿，不過又好好彩唔使等位。餐廳環境佈置有泰國氣氛，有泰式擺設，面積唔係好大，但係五臟俱全，見到板上嘅推介食物都幾吸引。先來一支泰國啤，泰國嘢味道比較濃郁，所以叫定支啤酒就冇錯，啤酒都幾清涼香口。泰式金邊粉係我嘅至愛，黃色嘅蛋皮，包住金邊粉，再有啲花生粒，份量都唔少，熱辣辣，唔算非常油膩，係我食過金邊粉比較健康嘅一款。泰國串燒有牛豬雞，各兩條，一共有半打。記得點醬汁，因為個醬汁令到串燒味道生色不少。一款比較有特色嘅就係炸皮蛋球，炸皮蛋球大概有八件，其實係皮蛋再加蝦餅，質感非常特別，難怪係推薦菜之一，再加埋泰式醬汁，非常開胃。最後重點推介，胡椒粉絲蝦煲。其實除咗蝦，仲有蟹等等選擇，不過個人都係鍾意食蝦，$200左右。粉絲嘅份量非常多，而且爽身再加埋醬汁，真係幾唔錯。