堅記車仔麵

营业中

休息中

九龍城不同既餐廳林立，日本菜，西餐，泰國菜，茶餐廳.............都好容易搵到，但香港地道既車仔麵店同小食店就絕無僅有。好耐冇食過車仔麵，經過見到就入去試試喇！可能因為係下午時段，食客唔多。店內採用比一般車仔麵店更環保既方式點餐。餐廳係用可循環再用點餐紙，點餐紙套於膠片中，食客直接用筆畫落膠片。落完單店員只需用濕布輕輕一抹就可以清潔乾淨。呢個方法既保留左車仔麵自己點餸既特色亦更環保，抵讚點餸咭上面有超過50款餸，好多出面既車仔麵店冇既餸佢都有。除左車仔麵，堅記仲有香港既特色街頭小食：秘製魷魚，韮菜豬血豬腸，咖哩魚蛋、豬皮、蘿蔔........今次我點左我食車仔麵既例牌餸：油麵+蘿蔔，豬大腸，豬血，濃湯+腩汁+小辣。豬血係正常既；蘿蔔煮既時間未夠，偏硬，但亦算清甜；食豬大腸最怕洗得唔乾淨，但堅記店員將大腸清洗得好乾淨，亦好入味，抵讚至於價錢方面，我覺得以車仔麵黎講係偏貴既，最平既餸係$7／款到$20不等。我點既3餸加凍飲1杯就要$53，算少少貴。