今日去車房拎番部維修完既車,中午二點半左右同車房老闆一行四人,到門口泊車買汽車零件,車房老闆話呢道有位就呢間,咁我話冇位就算不如去第二間,因為之前俾我印象真係唔好。
不過車房老闆朋友入左去坐低就算,佢叫左【豬扒乾炒烏冬 + 凍奶茶 $36 】,我另一朋友阿 Man 【西芹斑腩飯 + 凍檸茶 $36 】,肥豪叫下午茶餐【雪菜肉絲炆米 + 凍檸茶 $28】,我就叫左【豉油汁豬扒飯 + 凍奶茶 $36】。
車房老闆及肥豪都冇乜投訴,凈係話杯茶唔多掂,檸茶既茶好淡冇茶味,檸檬唔新鮮咁囉! 阿 Man就投訴得最多,佢凈係投訴杯凍檸茶,都已經
由頭到尾講唔停,佢又係不停詐型杯茶冇茶味又淡,佢仲話檸檬唔新鮮,係檸檬頭尾切凈果o的下欄o野喎!
我食果碗【豉油汁豬扒飯】,豬扒好鬆軟但冇厘味道,我覺得好似冇落鹽或豉油醃過咁,炸到好油膩上枱時仲好多油鋪面,豉油汁又係淡而無味,唔鹹又唔甜唔知想點?! 杯凍奶茶都還可以,但都係非常一般。
我最初叫【豉汁豬扒飯】,阿姐話聽唔明唔知係咩?咁我就話【豉油汁豬扒飯】有喇卦???
呢間餐廳我最唔滿意係服務,坐低永冇話俾杯清水清茶你,一坐低就即追問你叫咩食,少幫襯既根本餐牌都未睇清楚。我地兩點半去到,阿姐即刻同我地講o岩o岩冇哂午餐,又會咁o岩既???莫非想逼我地食貴野? 因為一般碟頭飯餐牌$28~30元,飲品另加$6~8元。
落左單之後,阿姐單手一搾餐具,加一張最薄最平價餐油紙扔低,金屬餐具散滿枱面,我地覺得極不衛生,於是叫阿姐俾一杯茶水我地,因為我地係想將餐具放落杯水浸一浸,希望心理上得到稍稍安慰啦!點知叫阿姐俾杯茶水,佢就已經好唔歡喜好黑臉啦,但最後都焗住俾左杯茶水我地。
食物及飲品上枱時仲差,唔會問邊位食乜飲乜,一野大力擺低就算。有兩杯凍檸茶一杯係小甜,佢扔低撈亂左就算,問番佢答唔到,唉!
食完車房老闆請客佢先離去,我地三個人坐左一陣都稍後離去。一個普通碟頭飯 + 飲品 $36元,唔可以話佢貴,但元朗隨街都可以搵到,$36元搵間環境及服務舒服少少一定唔難,我寫咁多食評,習慣第一印象都係服務,尤其有冇一杯茶水,我唔會因一杯茶水而唔飲其他野,亦唔會因為一杯茶水,而一定會將杯茶水飲哂,有時可能一啖都唔飲添!但服務就係要咁,做多唔好做少先可以賓至如歸嘛! :(
下次唔使旨意我再幫襯,唔怪得元朗衙門都列佢為黑名單,佢地仲話食物最唔得,我就覺得服務先最唔得,真係唔明點解咁多好評??? 仲有o的阿姐出入門口貪方便,唔拉埋個玻璃趟門,我地坐正門口出面熱風係咁吹入黎,一路食一路出汗,我終於頂唔順,仲要幫佢做埋人肉自動趟門添!
最低工資都實行左啦幾位阿姐,人工一定加左服務都要加啦~ :(
